Arisï nitamakwarhisti i semana, énka wérani jaka octubre kutsï ka inchaka ya noviembre 2016.
Autor: Redacción
) 
Autor multimedia: Eduardo Alonso Estrada
Arisï nitamakwarhisti i semana, énka wérani jaka octubre kutsï ka inchaka ya noviembre 2016.
I semana janonkusti ánimaecheri kw’inchikwa, ka eroant’anhasti yápuru ísï ixu Michoacán, purhepecheecha jakak’usïnti éska...
I semana janonkusti ánimaecheri kw’inchikwa, ka eroant’anhasti yápuru ísï ixu Michoacán, purhepecheecha jakak’usïnti éska...
Autor multimedia: Eduardo Alonso Estrada
I semana janonkusti ánimaecheri kw’inchikwa, ka eroant’anhasti yápuru ísï ixu Michoacán, purhepecheecha jakak’usïnti éska ánimeecha junkuasïnka mántani wéxurhini ka jimposï kéts’ïtakwa pákuasïntiksï ka pátspekua ampe ninhasïnti jatsirani jima énka eront’aani jarhaksï ánimeechani. I kw’inchikwa úkwarhisïnti yápuru ísï jini eraxamani ísï, japontarhu wanamukuni ísï, tsirontarhu ísï ka jini irietaecha énka p’ukumintu ísï jaka. Wáni kw’iripu turhisïicha yápuru ísï anapuecha jurasïntiksï ixep’ini ka inteechani jimpo wáni tuminu antakua pakarhusïnti ka kw’irhkwarhikweecha sési wininhasptinha.
Jini Tzurumútaro, campo santo sésimintu piriranhasti. Jima anapuecha nirastiksï ánimeechani erats’ïtani, tirinkini tsïtsïki ampe pákuani, kantela ampe tixatakuani. Inteni ireta jimpo p’intenhasti kéts’ïtakuani chúrikwa jimpo noviembre inchamani ka erantskutarani kéts’ïtanhasïnti ka ísï sési kasïperant’asïntiksï campo santoni.
Morelia Michoacán ménkuni noviembre inchamani, kópekwarhu úp’anhant’asti kéts’ïtakwaecha ka sési piriranhasti eratsiparini éska kw’iripu mítiawaka p’intekweechani ixu México anapuechani.
Íst’u i semana axu Michoacán wénakwarhisti Bienvenido Paisano énka xanhatani jaka juramutiicha ixu ka federación anapuecha, inteni jimpo wékasïntiksï éska kw’iripu énka jinkuajka Norti ísï wént’ani sési janonkuakaksï México. Eront’anhaxati éskanha junkuakaksï 63 mil xu anapuecha ka kw’inchikweechani nitamaani diciembre jimpo.
I wéxurhininha ísï erot’asïntiksï éska sánteru tuminu axanhant’aaka ka niárani jameri 2 mil 600 millones pesonha Estados Unidos wénatini, sánteru ka no wéxurhikwa.
Universidad Michoacana, ari semana mítakwarhint’asti ya, éska na mítikwarhipka jorhenkwarhiicha tsimani kutsï míkatini jatsisptiksï. Rector inteni jorhentpekwa anapu wantasti éskaksï úska pakatperanhani ka niwatiksï jorhenkwarhini máteru wantakwa ka ístu jarhoatanhatiksï jorhent’aminhani ka ísï úni jukarkwarhinksï casa de estudiante jimpo.
Jini Aguascalientes sïparpiri ma, inchakusptinha sïpani ma k’umanchikwa jimpo ka jimanha tanimu warhitiicha jarhaspti ka jupikani atanksï jurhixatarakweechani ka yawarhikata jimpo kwáp’ikwarhinhani, ka jima sïparpirinksï warhirani.
Estado de México jimpo, achaati ma énka arhinhajka ya “El justiciero” jirinhant’axatiksï jimpokanha t’amu kw’iripu wantikuaska, ts’ïminha sïpap’ixamanti mótsitarkweecharhu. Ísïksï jamaxapti sïpani énka inte achaati kwápiapka kw’iripuni énka jima nieni japka ka xanharu jimpo tiámu atarakwa jimpo wantikuasti, yáasï jameri no néma wantasïnti mítini ka nanimintu sïpakwarhi inte Justiciero arhirakata.
Estados Unidos ari 8 noviembre jimpo, erakunhati jimpanhi presidente, ka yáasï jameri nótki mítikwarhisïnti néminitu antawa, máruucha wantasïni éska Donald Trump antaaka ka máteruucha arhasïnti éska Hillary Clinton orhetamaxaka antakwani.
Presidente Barack Obama ka ístu Alicia Machado, pimarhixatiksï yámintu latinuechani éska winhaperaaka Hillary Clinton ka inteni erakunksï antaratanksï presidenciakwarhu.
Miguel García TinocoÁlbum | 
Miguel García TinocoÁlbum | 
Miguel García TinocoÁlbum |
Miguel García TinocoÁlbum | 
César VelázquezÁlbum | 
César VelázquezÁlbum |
César VelázquezÁlbum |
Derechos Reservados
© Notivideo
© Notivideo