Resumen de noticias en Purépecha.

Isï úkwarhisti ari semana énka sáno wérani jaka noviembre 2016.

Universidad Michoacána wétarhinchaxati 550 millones peso, ka ísï úni meyamuani jorhentpiriichani ka ánchikwarhiriichani i wéxurhini. Rector Medardo Serna González, jánkwarhixati juramutiichani federación ka congresurhu anapueechani kurhakuani éskaksï jarhuawaka tumina jinkoni, jimpoka mámaru ampe no úxati mayempini.

I semanat’u myánhasti inte jurhiatikwa Día Internacional para la Eliminación de la Violencia Contra la Mujer, ka jima xarhatanhasti niátakwa ma “Mujer Segura Michoacán”, énka jarhuawaka éska warhiitiiicha kwáp’ikwarhiaka teléfono celular jimpo, jima jatini úati ayenkpini énka ne ma wékani jawaka no sési kámani.

Juramuti Michoacán anapu Silvano Aureoles Conejo wantasti éska ixu, no mintsikanhaaka éska warhiitiicha no sési kámanhaaka, jimposï xanhataatiksï Alerta Alba ánchikwarhitani énka marhuawaka jirinhant’ani warhiitiichani énkaksï tsïnchijka ka no nani xarhant’ani.

INEGI wantasïnti éska sáno teruk’ani warhiitiicha énka ixu Michoacán irekaaka no sési kánhasïnti, at’anhani, no sési arhinhani ka no tuminu íntskuani o tuminu ampe ewakuarhiani.

I semana mítikwarhisti éska móts’ïtanhaaka general Pedro Felipe Gurrola Ramírez, énka jinteka mando Especial para la Seguridad Michoacán anapu. Secretario de Gobierno, Adrián López Solís wantasti éska nótki mítinhaxaka nénksï jatsiwa inteni orhets’ïkwarhu.

Jorhentpiriicha CNTE anapuecha jueves jimpo míkaasti juramukweechani presidencia municipaliichani, ka viernes jimpo orhutaasti xanharuechani autopista de Occidenteni ka xanharuni autopista Siglo XXI.

Jorhenkwarhiriicha normalirhu anapucha ménteru t’ámu mótsitarakua jupiastiksï, ka SSP ewak’uant’asti ka íntsant’asti nemankarichapka, ka no ne máni jupikastiksï ísï no sési úrini.

Estados Unidos kw’inchinhant’asti i semana Día de Acción de Graciasini, ka mayapestiksï éska na p’intenhaka arhini kw’ínchikwarhu Black Friday jinkoni, jimini mámaru ampe piánhasïnti ka no jukaparharasïnti, jóperunha i wéxurhini nó xáni ampe piánhasti.

Ari semananha k’éri ma jinchesti jini El Salvador ka máteru ireteechani jimpo énka jimak’u ísï jaka, ka méntkunha jenchexati, ka úpirintinha itsï japontarhu anapu wep’amukuni (tsunami) ka t’apchakurani icherini.

Axu México, juez ma no sésikua ínstkujti amparo arhikata jimpo, Javier Duarte énka jinteka gobernador Veracruz anapu, ka inteni jimpo nóksï jupikani, Secretaría de Gobernación wantasïnti éska yáasï jameri no mítikuarhisïnti nani jakiksï inte ka Tomás Yarrington, ex gobernador Tamaulipas anapu.

Secretaría de Salud wantasti éska tsimanui kw’iripu warhiska tsúkua jimpo influenza arhikatani, yáasï énka yáwani jaka ya, mánha Jalisco anapuespti ka máteru Yucatán anapu.
I semana kurhakwarhint’asti, éska warhiska Fidel Castro, énka Cuba anapu juramutipka, intenha 90 wéxurhini jatirispti. Wáni kw’iripu no sési p’ikwarherasti ka ístu máteru kw’iripu tsípisti nénka inte achamasï ísï warhika.

Resumen de noticias en Purépecha.

Autor: Redacción

Autor multimedia: Especial

Autor multimedia: Especial