Nosotros | Anunciarse | Contacto
Notivideo
Inicio | Deportes | Editorial | Espectáculos | Estado | Morelia | Nacionales | Purépecha | Sucesos

I ampe nitamakwarhisti i semana 28 noviembre ka 3 jurhiakwa diciembre 2016 jimpo.

)
I ampe nitamakwarhisti i semana 28 noviembre ka 3 jurhiakwa diciembre 2016 jimpo. Andrés Manuel López Obrador, i semana jurhasti Michoacán, janosti Morelia ka nirasti máteru municipioecharhu niárani... I ampe nitamakwarhisti i semana 28 noviembre ka 3 jurhiakwa diciembre 2016 jimpo.
Andrés Manuel López Obrador, i semana jurhasti Michoacán, janosti Morelia ka nirasti máteru municipioecharhu niárani...

Andrés Manuel López Obrador, i semana jurhasti Michoacán, janosti Morelia ka nirasti máteru municipioecharhu niárani, jimasï kurhakusti kw’iripuni éska winhaperaka ka jarhoani inteeri ánchikuarhitani énka eratsini jaka 2018 jmpo, winhats’ïtasti késkinha inte iretani jinkoni jarhaska ka no juramuti sïpap’iriechani jinkoni.
Janonkuxatiksïnha ya parakateecha énka arhikuarhijkaksï Monarca axu Michoacán, nótikinha miyunt’anhaxati námuni parakateecha janonkuskiksï ya jimini énka arhinhajka El Rosario ka Sierra Chinqua, Semarnat wantasïnti éskanha erokwarhixaka éskanha winhiakurhaakaksï 3.5 hectárea jwátarhu, méntkuni késki wéxurhikwa.
Axu Morelia i semana orhets’ïkuti Secretario Educación Pública anapu, Aurelio Nuño Mayer ka yúmu juramuti gobernadoriicha tánkuarhinhastiksï kúnkorhekua CONAGO anapuecha, ka jima wantastiksï ka ixestiksï namanka xáni xanhatakwarhitini jaka ya inte Reforma Eductiva arhikata ka inte ánchikwarhita Escuelas al Centro, ixestit’uksï nánka xáni ánchikwarhinhaaka ya ánchikua Programa Escuelas al 100, ka inte jimpanhi ánchikuarhita Aprende 2.0 ya, ka ístu máteru jorhentperakueeri ampe.
Aurelio Nuño wantastit’u éska jánkwarhixaka ya juramutiichani mántani Estado anapuechani jinkoni ka federación anapuni jinkoni, ánchikwarhinksï jorhenperakueecharhu ka úniksï erokani wátsï sapirhatiichani énka úpirinka axant’anhani Estados Unidos wératini yáasï énka Donald Trump juramutiwaka ka no sési janhaskwarhini jarhani.
PGR ari semana jini Veracruz, íntsant’asti, 250 millón peso, inte tuminunha jintesti énka Javier Duarte de Ochoani ewant’aakaksï ka jimanha marhuatanhaati inte tumina.
Jinisï Aguascalientes, Oaxaca ka Veracruz jimpanhi Gobernadoriicha wetanhasti jupikani juramukua. Ka Veracruz jimpanhi gobernador jintesti Miguel Ángel Yunes Linares, inte wantasti éska jimini kwerataxaka 100 mil millón peso énka no mítikwarhika nani pakaraski, ka éskanha xánku ewap’int’askaksï yáasï jameri mil 250 millón peso.
I semana, gobernador Banco de México anapu, Agustín Carstens, wantasti éska wémukunt’aaka inteni orhets’ïkukuarhu, intenha octubre 2017 jimpo kéntikuati jimpokinha materu ánchekorheta jirinhaxaka, wékasïntinha orhets’ïkuni inteni Banco de Pagos Internacionales.
Jorhentpiriicha CNTE anapuecha, kurhak’warhiparini éska meyamunhaaksï jarhop’erakwa bono arhikata, míkastiksï arini viernes mámapuru casetaachani énka xanharu autopista jimpo jaka, wantasïntiksï éska 32 mil ánchikwarhiriicha jorhentperakwa anapuecha nóksï íntsinhaxati inteni tuminuni, orhets’ïkuti SEE anapu Alberto Frutis, wantasti éska ísïiska ka mayemperanhati k’amarhuni jámani i wéxurhini, ka wétarhiatinha 200 millón peso.
Arit’u semana ninhasti, tsínkunt’ani Fidel Castroptini, nénka jintepka orhets’ïkuti Revolución Cubana anapu, wáni juramutiicha ka orhets’ïkutiicha yápuru ísï anapuecha nirastiksï Cuba ka jánhanharhini inteni achamasïni, presidente México Enrique Peña Nieto nirastit’u ka wantasti éska ménku inteni ireta jimpo jankwarhiaka sési páp’erani ka ánchikwarhini. Estados Unidos anapu juramutiicha no nirasti ka nít’u axanksï orhets’ïkuti ma.
I semana yápuru ísï kurhakwarhint’asti, éska avión ma wakorhint’aska ka wáni kw’iripu warhinhani, jimininha futbol ch’anariichanha warhisti Brasil anapuecha Chapecoense arhikateecha, wantanhasti éska 71 (tanimu ekuatsi ka témpini ma) kw’iripu warhinhaska. Ka kuímu kw’iripu xarhant’astiksïnha énka no warhikaksï, yáasï jamerinha yúmu kw’iripu jarhasti tsinhap’erakwarhu jini Colombia, jimpoka máteru warhisti nák’iruksï sési ts’inani japka.
Tátsikwa énka na ísï kurhantekwarhipka éska avión wakorhint’aspka, wantanhant’asti éska t’ámu kw’iripu no warhiska jimpokaksï no jataspkaksï avionini. Yáasï ya mítinhasti éska avioninha isï úkwarhinchaspka jimpoka gasolina k’amanhispka ka nóteru úni karani ka wakorhint’ani imani jwátani jimpo Cerro Gordo arhikata énka Antioquía Colombia jaka. Ari avionieecha ewanhantásti sésekwa ka nóteruksï úaati ánchikwarhini.
Notivideo
Derechos Reservados
© Notivideo