Arisï nitamakwarhisti i semana, wénani 19 jurhiatikwa ka 23 jurhiakwa jameri diciembre 2017 jimpo.
Autor: Redacción
Autor multimedia: Especial
Por: Alicia Mateo
Axu Michoacán i semana, ánchikwarhiriicha SEE, Secretaría de Salud, ka Universidad Michoacana ka ts’ïmit’u Sindicato de Trabajadores al Servicio del Poder Ejecutivo (STASPE). jánkwarhinhasti kurhakwarhinhani éskaksï mayemunhaaka, jimpokanha nótki mayemuaxatiksï ka nít’u inteni aginaldo arhikatani íntsinhani jakiksï.
Viernesï jimpo gobierno Michoacán anapu ka juramuti Universidad Michoacana anapu ústiksï tuminu ewap’ini, sánonha 300 millón peso, ka ínteni tuminuni jimpo úatiksï mayemuani ánchikwarhiriichani Universidad Michoacana anapuechani ka íntsaani aguinaldo ka máteru jásï jarhoap’erakwa ampe. Ka ít’u Gobierno Michoacán anapu kurhach’awasti STASPEni ts’ïmit’u kurhakwarhixati éskaksï meyamunhaaka, ka ts’ïichant’u ka jorhentpiriichani meyamunhasti k’operunha no yámintu.
Ka mámapuru ísï Michoacán, kurhantekwarhisti, éska k’amanhiska gasolina, ka no nani ataranhant’ani jarhani, wantanhasïnti éska nónha janonkuska gasolina jimpokanha jini Hidalgo énka jaka Refinería Pemexiri no káni gasolina axaska axu Michoacán ka máteru estadoeechani jimpo. Jimposï kw’iripu jamati jirinhani nani piáni gasolina ka yawani ka yóni jimpo úni piáni.
Jini Estado de México, Municipio Tultepec jimpo, jukari no sési úkwarhisti, jima mayepikwarhu San Pedro arhirakata énka chararakwa ampe únhajka ka íntspikwarhianka kurhip’ijti chararakwa, ka wáni kw’iripunha warhinhasti 39 xáni chararakwa tixarani, máru íntspikwarhiriicha ka máteru piériicha, ka 46 kw’iripu kurhijtiksï ka pánhastiksï ts’inaani mámapuru ts’inap’erakwa jimpo jima Estado de México.
Jini Turquía, Andrei Karlov énka jima jintepka embajador Rusia anapu, tiámu atarakwa jimpo at’ajtiksï, jima tánkwarhikwa ma jimpo tumpi ma ísï xarhatakwaspti éska jintespka Andrei policía ka jima tátsipani ísï kw’anirasti ka wántikuni. Jimat’u at’apirinksï kw’ariicha seguridad anapu wantikustiksï, ka tumpinha jiwakwarhisaanti éska Alepo, Siria kómu nitamakwarhixaka.
Ka jininha Berlín, Alemania no sési úkwarhisti, mayapikwa ma jimpo énka jinteka Breitscheid Platz, k’éri ma mótsitarakwa o móskutarakwa atach’akuasti kw’iripuni ka 9 ( yúmu t’ámu) kw’iripu warhisti ka wáni kw’iripu atakata p’akarasti, jima anapu juramutiicha wantasïnti éska inte xásï ampe no ísku ampeska, éskanha jinteska warhiperakwa.
Miguel García TinocoArisï nitamakwarhisti i semana, wénani 19 jurhiatikwa ka 23 jurhiakwa jameri diciembre 2017 jimpo. | 
Miguel García TinocoArisï nitamakwarhisti i semana, wénani 19 jurhiatikwa ka 23 jurhiakwa jameri diciembre 2017 jimpo. | 
Miguel García TinocoArisï nitamakwarhisti i semana, wénani 19 jurhiatikwa ka 23 jurhiakwa jameri diciembre 2017 jimpo. |
Miguel García TinocoArisï nitamakwarhisti i semana, wénani 19 jurhiatikwa ka 23 jurhiakwa jameri diciembre 2017 jimpo. |
Derechos Reservados
© Notivideo
© Notivideo