Resumen de noticias en Purépecha.
Autor: Redacción
Autor multimedia: Especial
Ísï inchajti arhi wéxurhini 2016.
Wénakwarhisti jimpanhi wéxurhini 2017 ka ixu Michoacán ka yápuru ísï México no jayepinhint’axati námanka jukaparhaka gasolina ka ístu yámintu ampe. Inte jimposï kw’iripu wérasti kurhakwarhini éska no xáni jukaparhaka gasolina jóperu kw’iripu máru irieteecharhu no sési jánhasti sïpani ampe.
Axut’u Michoacán wéakunhasti kurhakuarhini éska gasolina késkunhaka, kw’iripu no míkasti xanharuuchani ka nót’u jamasti sïpani ampe.
Juramuti Michoacán anapu wantasti éska jánkwarhiaka tuminu sési marhuatani, ka máru ánchikwarhiriichani chuant’awati ts’ïmiicha énka contrato jimpoku ánchikwarhini jaka.
Yáasï énka gasolina karhatanhaka, mámaru ampe sánteru jukaparhaxati éska nitarakwa Nák’iru orhets’ïkutiicha wantaka éska no sánteru jukaparhaka mámaru ampe, kw’iripu ixexati éska yámintu ampe jukaparhaska ya.
Universidad Michoacana, ménkumintu wantanhakwarhisti kánkuani jarhani jorhentpiriichani ka ánchikwarhiriichani, jimposï ts’ï kurhakwarhini jati éskaksï mayamuminhaka diciembre jatini anapu ka yásï jameri. Inteni ísï kurhakwarhiparini máteru kúnkwarhikweecha kúparakustiksï winhachani, ka wantaxatiksï éskaksï yámintu jorhentperakueechani anhaxustakaksï huelga ma jimpo énksï no mayemunhaka.
Asociación Nacional de Tiendas de Autoservicio y Departamentales A.C. wantaxati éskanha 423 atarantskweecha énka jimini kúnkwarhitini jakaksï no sési úmenhastiksï, yáasï énka weranhani jaka kurhakwarhinhani éska no jeokwarhisïnka éska gasolina xáni jukaparhaka, wantasïntiksï éska Ciudad de México sánteru sïpakuastiksï.
Énka namuni jurhia kweratani jaka pari Donald Trump presidenteeni, wantasti ménteru éska México meyampiaka tsintsirakwa ma énka inte wékani jaka jawatani, jimposï juramutiicha México anapuecha wantastiksï éska no ísïwaka. Ist’u Luis Videgaray wantasti éska México ka E.U. janhanharperakaksï.
Diosï meyamu énkats’ïni ménku arhint’ani jaka.
Derechos Reservados
© Notivideo
© Notivideo