I ampe úkwarhisti i semana, wénani kwímu jurhiakwa jimpo ka t’émpini jurhia febrero 2017 jameri.

Autor Alicia Mateo.

Jini Lázaro Cárdenas i semana t’émpini gobernadoriicha énka CONAGO anapueka, tánkwarhistiksï ka wetenhani inteni Comisión para el desarrollo de las Zonas Económicas Especiales, ka jimini Silvano Aureoles Conejo orhets’ïkuati.

Jimini tánkwarhikwarhu Graco Ramírez, gobernador Morelos anapu, wantasti éska wétarhiaka sésimintu marhuatani Zonas Económicas Especialiichani ka úni kwáp’ikwarhini México máteru irieteechani jinkoni.

Gobernador, Silvano Aureoles wantasti éska wétarhisïnka marku ánchikwarhini máteru estadoechani jinkoni, ka ísï winhaperani ánchikwarhitani yápuru ísï, ísï éska Lázaro Cárdenas na eratsinhani jaka.

José Antonio Meade, énka jinteka secretario de Hacienda y Crédito Público, wantasti éska ari ánchikwarhita jarhuawaka éska México wiwinhasï jawaka

T’amu kw’iripu warhinhasti ka tsimani kw’iripu atakata pakarasti ari semana jini La Piedad, jimpoka jupiperaskaksï no sési útspitiicha. Ístunha ma soldado ka máteru kw’iripu warhiska énkaksï móskuni japka ma mótsetarakwani jimpokanha ma granada charapti.

Jini Aquila, yúmu policíachani jupikawasptiksï ka tanimu jurhiatikwaksï ísï jupikata jatsiani, jimpokanha kurhakwarhixapkaksï éska policíaecha nóteru kwáni jawaka xanharu jini Tizupan. Presidente municipal jimini anapu, kurhakuspti PGJEni éska jarhoapirinka jirinhaant’ani ka sési ixeant’ani.

Yápuru ísï mítikwarhisti éskanha Chapoeri wap’eecha axaska ma karakata, ka jima wantasïntiksï éska Dámaso López, Mayo Zambadani jinoniksï jamaspka akutsikuani wékani atawanksï.

Éska na mítikwarhika ya, Donald Trump wékaxati éska nóteru ne ma inchakuaka Estados Unidos, jimposï wékani jati watsotakwa jatsikuni México ísï, ka intenha 21 mil millón dólar jukaparhaati, ka tanimu wéxurhini jimpo jawatanhaati. Éska na kurhantekwarhika ya, Donald Trump wékaxati pikurhukuni tuminuni énka janojka ixu México, ka énka ixu anapucha jini wératini axant’ajka. Jimposï Senadoriicha Axu anapuecha wantani jati éska ts’ïmit’u úaka juramuni éska México úaka ménkuni tumini pitarhiani jini anapu fabrica arhikateechani énka ixu México ánchikwarhini jakaksï.

Wáni kw’iripu Estados Unidos anapu, ménku no jiókwarhixatiksï Donald Trump, jimpoka ménku no sési juramuxaka, ka namuni ch’anariicha fútbol americano arhikata anapuecha, ts’ïmit’u jameri wantastiksï i semana, éska no niwaka nierakunksï Casa Blancarhu yáasï énka antakaksï super bowl jimpo ísï éska na p’intenhajka énkaksï antajka mántani wéxurhini.

I ampe úkwarhisti i semana, wénani kwímu jurhiakwa jimpo ka t’émpini jurhia febrero 2017 jameri.

Autor: Redacción

Autor multimedia: Especial

Autor multimedia: Especial