Nosotros | Anunciarse | Contacto
Notivideo
Inicio | Deportes | Editorial | Espectáculos | Estado | Morelia | Nacionales | Purépecha | Sucesos

Resumen de noticias en Purépecha.

)
Resumen de noticias en Purépecha. I xásï ampe nitamakwarhisti i semana, wénani lunes 13 jimpo ka viernes 17 jameri febrero 2017 jimpo Resumen de noticias en Purépecha.
I xásï ampe nitamakwarhisti i semana, wénani lunes 13 jimpo ka viernes 17 jameri febrero 2017 jimpo

I semana axu Michoacán, miánhaparini Día Mundial de la Lucha Contra el Cáncer Infantil, jini Hospital Infantil Morelia anapu jimpo, 60 sapiicha énka cáncer p’amenchatiichaaka kw’ínchikwa úminhant’asti jimpoka sésimintu jánkwarhixakaksï ampakint’ani, ísï wantasïnti táatiempeecha ka ts’inap’iriicha. Jimini sapi Gabriel, énka 10 wéxurhini jatirika, sïranta arhisti énka wantajka éskaksï méntku ísï mintsikani jawakaksï éskaksï ampakint’aka wíwinhasïnt’aparini.

Gobernador Silvano Aureoles Conejo nirasti Estados Unidos, Michoacán anapuechani p’orhempiani, ka ístu jini tánkuarhisti Chicago ka California juramutiichani jinkoni, ka ayenkuasti ne na jarhoawaxakiksï kw’iripuni énka jini no sïranta kánkwarheajka ka úni kwáp’ikwarhini yáasï énka Donald Trump presidenteka ka ts’ïmiichani wékani jarhani p’etant’ani.

Michoacán anapu Empresarioecha ka industrialiicha jirinhaxatiksï máteru ireteechani nani meyapini mámaru ampe, énka ampe Estados Unidos ménku úntani jawaka sánteru meyampikwa kurhakuani. Jirinhaxatiksï meyapini Asia ísï.

México anapu juramutiicha wantasti i semana éska consuladoecha úaka acta de nacimiento íntspent’ani xu anapuechani nani wéjkinksï jarhani o irekani jarhani. I ampe sánteru marhoakuawati México anapuechani énka Estados Unidos irekani jakaksï ka énkaksï wétarhinchani jakaksï sïranteechani ka ísï úni jini sïranta kurhakw’arhiani ka úniksï jini pakarani ánchikwarhini.

Jini España, xarhatanhasti 11 wéxurhini jimpo, éska infanta Cristina no k’amanharhintskwa jatsiska ts’ampikwani jimpo énka wantanhanka éska tuminu sïpaspka ka tuminuni no sési úrani. Yáasï achaateempa ex Duque de Palma ónhakata jarhasti jimpoka intenksï k’amanharhint’aska ka máteru kw’iripuechani énka inteni jinkonksï ánchikwarhianka.

Jini Estados Unidos ma jurhiatikwa latinoecha no ánchikwarhinhasti, ka wéakunhasti xanharu kurhakw’aparhini éskaksï no chutanhaka jima énkaksï sési ánchikwarhini jakaksï. Inte jurhia no ánchikwarhinhasti, wáni kw’iripu Estados Unidos anapuecha ínteni úkuani wínhaperasti ka ístu uáni íntspikwarhikweecha no mítanhasti ka ísï jarhoawastksï latinoechani.

Mítikwarhisti i semana éska 144 rectores universidades públicas Estados Unidos anapuecha wantaska éskaksï jarhoawakaksï kw’apiant’ani jorhenkwarhiriichani latinoechani énka E.U. jakaksï ka no sïranta kánkwarhiani dreamers arhikateechani, jimpoka méntku wantanhaxaka éska úpirinkaksí petant’ani jini, wantastiksï éska wínhaperakaksï UNAMini jimpoka jimini úpirintiksï inchani énka jameri junkwapirinkaksï axu México.

Notivideo
Derechos Reservados
© Notivideo