Resumen de noticias en Purépecha.
Autor: Redacción
) 
Autor multimedia: Especial
Resumen de noticias en Purépecha.
Isï úkwarhisti inte semana énka k’amarhuka febrero kutsï ka ichaka marzo 2017 jimpo.
Isï úkwarhisti inte semana énka k’amarhuka febrero kutsï ka ichaka marzo 2017 jimpo.
Autor multimedia: Especial
Axu Michoacán i semana kurhantekwarhisti, éska gobernador Silvano Aureoles Conejo, wantaska éska wékaxaka jinteni nénka antapiaka PRD jimpo ka úni jinteni juramuti México anapu. Éska na mítikwarhika 2018 jimpo erakunhati jimpanhi presidente. Wáni kw’iripu wantasti éska no sési jarhaska ísï wantani jarhani jimpoka inteeri juramukwa nótki k’amarhuxaka ka t’ini wékani jarhani máteru ampe jupikani.
Jini Zamora jorhentperakwa ma jimpo cherakwarhistiksï jimpoka wantakwa ma axaspkaksï whatsapp arhikata jimpo énka wantanhanka éska ima jurhiatikwa at’awapirinkaksï jorhenkwarhiriichani ka jorhentpiriichani. Jimposï policíaecha nípti jorhentperakwarhu ixeni ka jorhenkwarhiiichani eranhakuasptiksï karakata pákwa ka no ma ampe ixent’ani.
I semana ixenhant’asti tanimu kw’iripu atakateecha jini Paracuaro, jimpoka ménku warhiperaxatiksï Los Viagras imeechani jinkoni énka Ignacio Rentería El Cenizo orhets’ïkujka wékani yápuru ísï ireteecharhu ísï inchakuni.
T’émpini ma kw’iripu warhiiri ixeant’anhasti jini Veracruz mótsitarakwarhu ma jimpo, énkaksï Boca del Río jurarkuapka. Ts’ïminha ísï xarharasïnti éska no sési kawaspkaksï. Gobernador Miguel Angel Yunes, wantasti éska ts’ïmi mítinhant’aski ya ka íntsant’aska táateempeechani. Ka want’astit’u éska jánkwarhiakaksï jirinhani ka xarhatani ne ísï no sési káaski, ka ístunha jánkwarhiati sánteru kwáni iretani sánteru wáni policíeechani jinkoni.
Arhi arhip’erastiksï perredisteecha (PRD) jimpoka Miguel Barbosa Huerta énka jinteka senador PRD anapu, wantaska éska inte ánchikwarhiaka Andrés Manuel López Obradorini jinkoni ka jarhuawati partido Morenani, ka jima jameri kw’iripuni p’imariati éska jarhowaka éska López Obrador jintewaka presidente México anapu 2018 jimpo. Ricardo Anaya PAN anapu, wantasti éska ts’ïmi junio jimpo xarhataka ne ch’anap’ia PANni jimpo.
Jini Siria Al Qaeda wantasti éska warhiska tsïmiiri orhets’ïkuti Abu al Faraj al Masri, énka Estados Unidos bomba kw’anip’ani jápka jima.
Estados Unidos Donald Trump nirasti wantani Congresorhu, ka jima ménkuni wantasti éska wékaxaka jawatani watsotakwa Méxiconi óntatani. Inteni wantakwani jimpo máruksï wantasïnti éska nóteru xáni k’éramakwarhiska ka xarharasti éska wékasïnka ireteechani janhanharhiani.
Derechos Reservados
© Notivideo
© Notivideo