Xásï ampe nitamakwarhisti i semana énka k’amaraka viernes 16 jurhiatikwa junio 2017 jimpo.
Autor: Redacción
) 
Autor multimedia: Especial
Xásï ampe nitamakwarhisti i semana énka k’amaraka viernes 16 jurhiatikwa junio 2017 jimpo.
Ma ánchikwarhiri warhisti Refinería Pemexiiri jimpo jima énka Salina Cruz Oaxaca jaka, jimanha itsï inchaspti xáni Janikua Calvin.
Ma ánchikwarhiri warhisti Refinería Pemexiiri jimpo jima énka Salina Cruz Oaxaca jaka, jimanha itsï inchaspti xáni Janikua Calvin.
Autor multimedia: Especial
Por Alicia Mateo:
Inchamani i semana kurhantekwarhisti éska 8 policíaecha Grupo de Operaciones Especiales anapu warhiska, ts’ïminhapti nirasïanti Los Reyes ísï ánchikwarhini énka xanharu jimpo menhankwarhipka mótsitarakwa. Máteru policía no sési atakata pakarasti, ka Morelia jarhasti ts’inap’ikwarhikwa iáasï jameri, ka ístu, juramutiicha ts’inkunhant’asti jánhanharhikua jimpo 4 policíaecha jima Secretaría Seguridad Pública jimpo.
T’ámu semana antankurasïnka ya énka ayempiti Salvador Adame Pardo énka jini Nueva Italia jupikanhaka ka pánhani, ka ísi jimposï ayempitiicha Michoacán anapuecha i semana wérastiksï xanharu jimpo Morelia kurhakwarhiparini éska juramutiicha wantaka na na jamaxakiksï ánchikwarhini xarhatant’ani.
Ixu Michoacán wantanhiaxatiksï juramutiicha federación anapuecha jimpoka káni gasolina sïpanhaxaka, ka wantasïntiksï éska Cuitzeo ka Tarímbaro jinteskaksï irieteecha énka ísï jámani jakaksï sïpani, jimasïnha ét’akustiksï éska pitaskuxakaksï, ísï wantasti comandante XXI Zona Militar anapu José Francisco Martínez Cázares, ka arhasti éska Ejército jámani jawaka Pemexini kw’ani ka eraxani.
Axu México, Janikwa énka arhiranhaka Calvin tormenta tropical no sésimintu janirasti yápuru ísï, Oaxaca ka Guerrero winhani janirasti ka ch’ampanharhitasti jwáta ma ka tupchakurasti kw’iripuni ka wáni kw’iripu warhinhasti ka ístu kwímu soldadouecha, tsïminha kw’iripuni jamaxapti jarhoatani ka jima icheri túpchakurani.
Ma ánchikwarhiri warhisti Refinería Pemexiiri jimpo jima énka Salina Cruz Oaxaca jaka, jimanha itsï inchaspti xáni Janikua Calvin Janirani ka refineríanha tixarasti miércoles jimpo ka viernes jameri pátanhaspti.
Ari 14 junio jimpo, yápuru ísï miánhant’asti inte achaati Ernesto “Che” Gevara. Intenha jini Rosario Argentina antap’enusti 1928 jimpo, ka mak’u Fidel Castro jinkoni, orhets’ïkusptiksï Revolución Cubanani. Che Guevara, ístu mítinhasti éska eyankpiti, karari ka ts’inhap’iri, jóperu sánteru mítinhasti éska jánhaskati énka wékampka no ampe jatsikorheriichani jarhuatani ka sánteru sési jak’unt’ani arini parhakpenini.
Jini Londres Ingraterra, ari miércoles k’éri ma kurhupekua k’amap’asti k’eri ma k’umanchekwarhu énka wáni kw’iripu irekani jápka, no nema mítesti yáasï jameri ampe jimpo ísï tixaraski, jima wétarhisti éskaksï nipirinka pátani 200 bombero arhikateecha. 50 kw’iripucha atakata pakarasti, wantanhasïnti éska 30 kw’iripu warhiska arini kurhupekwarhu, jóperu nótki sési mítekorhexati na xánimintu warhiski jimpo útasï yáasï jameri noksï xarhant’axati.
César VelázquezIchuskuni | 
César VelázquezKánharhikweecha | 
César VelázquezKamata úriicha |
César VelázquezWarhiiti janhaskati | 
César VelázquezKéts´ïtakwa |
Derechos Reservados
© Notivideo
© Notivideo