Resumen de noticias en Purépecha.
Autor: Redacción
Autor multimedia: Especial
Ciudad Hidalgo, Michoacán, tsínkunt’astiksï ka jatsint’astiksï t’ámu uátsï sapichuechani Isabel, Dakota, Axel ka Martínini ka táateempani: inteechaninha Isabel Martínez wantikuasti jini Atlanta, Georgia, Estados Unidos ka jintesptinha amampa ts’ïmiiri. Jima anapuecha winhani wantanhianhajti ka ikiatperanhani jimpoka inte warhiiti xáni no sési ampe úka, yáasï yáasï Isabel norti jarhasti ónkwarhitini ka jininha juramukwa jimpo k’amanharhint’aati. Táati k’ériimpa Wilibaldo, wantasti, éska inte puákunt’ati Isabelini.
Juramuti Aguililla anapu, Israel Mendoza Mendoza, wantaspti ya éskaksï eraxasamanka ya no sési útspiriicha Los Viagras ka Cártel Jalisco Nueva Generación, ka éskaksï chéraspkaksï ya inteni ka chenempao anapuecha ka máru ánchikwarhiriiichani jima ayuntamientorhu anapuecha. Juramutiicha Gobierno del Estado anapu wantasti éska ísï kwanixaka, jimposï Secretario de Gobierno, Adrián López Solís wantasti éska jámaxakaksï kwáp’iani ka jarhuani juramutini ka ánchikwarhiriichani aguililla anapuechani.
Arit’u semana mítiperastiksï éska jini Cuidad de México, no sési útspiriicha sésimintu inchakutixaka, ísï xarhatastinha Marina Armada de México jimpoka jámaskaksï jirinhani na ka ne intspikwarhisïni inteni droga arhikatani, inteni jimposï niárakuastiksï jupiani ts’ïmini no sési útspiriichani énka jintekaksï Cártel de Tláhuac. Jima jupiperastiksï ka jima jupiastiksï ka warhini orhets’ïkuti Jesús Peréz Luna énka arhinhanka El Ojo, ka máteru 7 kw’iripu no sési útspiriicha warhisti, ísï xáni no sési janharhintskwa jimpo xanharu míkanhasti ka mótsitarakua ampe kurhirastiksï méntkuni éska na jánhajka Michoacán.
Ciudad de México juramuti , Miguel Ángel Mancera, wantasti éska nónha jarhaskaksï inchakutini jimini no sési útspiriiichaa, ka wantasti éska Marina Armada de México jámaska jupiani inteni kw’iripuni jóperunha tanimu kutsï jámasptiksï jánhaskani na jupiani, jimpokanha no sési útspiriicha jámasptinha ya xanharu míkani ka 16 kw’iripu jupikanhastiksï.
Jini Venezuela, ts’´ïma énka no jinteka Nicolás Maduroni jinkoni, kw’iripuni yórhistiksï ka ma jurhiatikwa, chúskuni ka erantskuni no ánchikwarhinhasti yápuru ireteecharhu, ísï úkwarhisti jimpokaksï kw’iripu no ixenchasïnka Nicolás Maduroni, ka méntku úntaxatinha no sési janhaskwarhini Venezuela ka i jurhiatikwa tanimu kw’iripu warhistiksï ka 8 atakata jarhastksï jimpoka jupiperanhaska mámapuru ísï. Henrique Capriles jámasïnti orhet’sïkuni íni winhachakuani, ka wantasti éskanha sáno yápuru ísï no ánchikwarhinhaska.
Ka ixu México, Venezuela anapuecha méntkuni wérastiksï winhachani éska nóksï jiókwarhisïnka éska úkwarhika Asamblea Constituyente, jimpokanha inteni jimpo Nicolás Maduro wékani játi sánteru winhaperant’ani imeeri juramukuani. Ka Venezuela anapuecha énka Michoacán irekani jakaksï wantasïntiksï éska sésimintu no sési nitamakwarhinhaxati kw’iripu jini ka úntastinha ya t’irekwa kweratani ka nóterunha úsinti ts’inap’ikwa jarhani. Ísï jánhaskwarhini jarhani, presidente México anapu kurhakusti juramutini jini Venezuela anapuni éska két’ataaka inteni eratsikwani Asamblea Constituyenteni.
Derechos Reservados
© Notivideo
© Notivideo