Resumen de noticias en Purépecha.
Autor: Redacción
) 
Autor multimedia: Especial
Resumen de noticias en Purépecha.
Ampe ka ampe nitamakwarhiski i semana wénani 16 (t’empini kwímu) jurhiakwa enero 2017 jimpo.
Ampe ka ampe nitamakwarhiski i semana wénani 16 (t’empini kwímu) jurhiakwa enero 2017 jimpo.
Autor multimedia: Especial
Orhets’ïkuti Secretaria de la contraloría en Michoacán, Silvia Estrada Esquivel ayampisti éska gobierno t´émpini tsampikwa inchamutaaska Procuraduría General de la República ka ménkuni ixu Procuraduría Michoacán anapurhu. Inteni jimposï tsampikwasti juramuti tamapuuchani jimpokanha ixekuaskaksï éska wáni tuminu no sési marhuatanhaska nénka ts’ïmiicha juramuni japka. Jimposïnha no antankuni jati tuminu ixu Michoacán.
Ari semana ixu Morelia máru kwap’iriicha abogado arhikata Universidad Michoacana wéntstiicha, xanhataxatiksï kwap’ikwa ma kw’iripuni jarhoataparini ka anhaxustani éska nóteru xáni jukaparhaka gasolina. P’imarhixatiksï kw’iripuni éska antaparhakunhaka ka sïranta inchamutani ka ísï kwap’ikwarhinhani amparo jimpo.
Secretario de Gobernación, Miguel Ángel Osorio Chong, axaminhasti sïranta ma énka tánkwarhikweecha Organizaciones civiles y sociales ka Comisión Estatal de Derechos Humanos, inteni karakatani jimposï kurhakuni jatiksï éska José Manuel Mireles Valverde jwánkunhaaka Michoacán, jimpokanha inte yawani ónkwarhitixaka máteru estado jimpo. Inteni sïrantani jimpo ísï kurhakuxatiksï jimpokanha inteni achaatinksï no janhanharhinhasïnka, ka jimpoka jukari p’amenchaxati yáasï.
I semana kurhantekwarhisti éska Monterrey, Nuevo León tumpi sapichu ma t’émpini yúmu jatiriti incharaspka ma tiámu atarakwa jorhentpekwarhu ka inteni jimpo jorhentpiriimpani ka tanimu jorhenkwarhiriichani kw’anirani ka at’ani. Énka na ísï úpka jantiok’u at’akwarhisti tiámuni jimpo.
Isï úkwarhini Monterrey kw’iripu no sési ixejti ka wantanhiasti ampe jimposï ísï kw’ani, jimposï wetarhijti éska táateempeecha ixeani jawaka wap’eechani. Ka juramutiicha wantasti éskaksï xanhatant’aaka inteni Mochila Segura arhikatani ka ísï eranhakuani ampeksï incharasïni jorhentpekweecharhu.
Mítikuarhisti éska i jueves chúrikwa Joaquín Guzmán Loera, Chapo arhikata, énka ónhakata jápka jini Tijuana, axanhaska Estados Unidos jimpoka juramutiicha México anapu ísï juramuska, ka no jiókorhesti éska kwáp’ikwarhipirinka amparo jimpo, jimponhasï ísï axanhati.
Viernes jimpo Donald Trump, jatsinant’asti éska jimpanhi juramuti Estados Unidos anapu, ka tánkwarhinant’asti jánhanharhint’ani juramukwani eska jini na p’intenhaka. Jima wantasti éska none máteru úaka inchaakuni imani iretani jimpo.
Derechos Reservados
© Notivideo
© Notivideo