I semana énka k’amarhuni jaka febrero kutsï 2017 jimpo, ari ka ari kurhantekwarhesti.

Yúmu tanimu kw’iripu warhinhasti i semana imani xanharuni jimpo autopista siglo XXI jimasï énka puente Ajunoeri jaka, wantanhasïnti éska mótsetarakwa no sési úkwarhenchaspka jimpoka máteru mótsetarakuani jinkoni winhani watperaspkaksï. Tanimu kw’iripu sapiichasptiksï. Tsïma enka ísï manhataka mótsetarakwani tsimani achaatiichaspti ka sïpakwarhisptiksï énkaksï pánhani jápka tsinap’ikwarhu, iasï wantanhasti ya éska jupikanhaska ma kw’iripuni énka Alejandro D. arhikwarhika ma ekwatse kwímu jatiriti.

Silvano Aureoles Conejo, ménteru wantasti éska tuminu kwerataxaka jimani ísï anapu enkaksï juramuanka Salvador Jara ka Fausto Vallejo, ísïnha xarhatakuasti Auditoría Superior de la Federación, yáasï jamerinha no mítikwarhisïnti nani pakaraski 5 mil milloni
Peso, ka jimanha Pensiones Civiles del Estadot’u, 500 millones kantsperaxapti

Secretario de Comunicaciones y Transportes, Gerardo Ruiz Esparza, wantasti Morelia, éska Plan Michoacán ménku xanhapaxaka, ka wanastit’u éska 12 mil millón marhoawaka séserani puerto Lázaro Cárdenas, ka ísï wantasti éska xanharuecha sési jántskaxati ka k’amakunhaati ánchikwarhinani éska na wantakata jaka.

Jini Veracruz i semana, ixenhant’asti k’umanchikwa ma nanienka ex gobernador Javier Duarte jima anapu patsani jápka mámaru ampe káni jukaparhakata, ka karakateecha énka karhanharhikata jákanha ampenka ka neni jinkonksï jamaspi ísï no sési úni. Éska na mítikwahrika Javier Duarte yápuru ísï jirinhaxatiksï ónhatarkwarhini.

Achaati ma énka Estados Unidos chutanhapka ka Tijuana axantanhani Guadalupe Olivas, parhikutakwa jimpo, yótakwarhu kw’ákukarhisti wékani warhikwarhini, wantanhasïnti éska ísï úspka jimpoka no sési pikwarhesaanka énka nóteru wap’eechani ixepirinka, jimpoka ts’ïma Estados Unidos p’akaraspti.

I xásï ampe úkwarhixati jimpoka presidente Donald Trump no janhaharhixaka Latinoechani wékani yámintuechani chuant’ani, wantaparini éskaksï no sési útspitiichaska, ka íst’unha wáneraxati policíeechani énka kwáni jáwaka éska nóteru ne ma inchakuaka Estados Unidos.

Sésimintu kurhantekwarhisti i semana, énka wantanhaka éska Felipe Calderón ka OEA anapu Luis Almagro ka Mariana Aylwin énka juramutipka chile anapu, no úspkaksï Cuba niarani imani míntskuani jimpo énka Oswaldo Payá úmennhanka, jimpoka jini anapu juramukwa no sésikwa íntskuaspti, jimpokanha ts’ïmiicha no sési ampe manatapirinti ka kw’iripuni máteru jásï eratsikwa inchats’ïtani.

I semana énka k’amarhuni jaka febrero kutsï 2017 jimpo, ari ka ari kurhantekwarhesti.

Autor: Redacción

Autor multimedia: Jesús Romero

Autor multimedia: Jesús Romero