Nosotros | Anunciarse | Contacto
Notivideo
Inicio | Deportes | Editorial | Espectáculos | Estado | Morelia | Nacionales | Purépecha | Sucesos

I ampe nitamakwarhisti ari semana wénani 23 jurhiatikwa ka 29 jameri julio 2016 jimpo.

)
I ampe nitamakwarhisti ari semana wénani 23 jurhiatikwa ka 29 jameri julio 2016 jimpo. Presidente municipal Pungarabato anapu, Ambrosio Soto Duarte, wantikunhasti sábado 23 jimpo, énka nint’anka Huetamo wératini... I ampe nitamakwarhisti ari semana wénani 23 jurhiatikwa ka 29 jameri julio 2016 jimpo.
Presidente municipal Pungarabato anapu, Ambrosio Soto Duarte, wantikunhasti sábado 23 jimpo, énka nint’anka Huetamo wératini...

 I ampe nitamakwarhisti ari semana wénani 23 jurhiatikwa ka 29 jameri julio 2016 jimpo.

Presidente municipal Pungarabato anapu, Ambrosio Soto Duarte, wantikunhasti sábado 23 jimpo, énka nint’anka Huetamo wératini, juramutiicha wantasïnti éska jini Huetamo niraspka ánchikwarhiteeri ampe ixeni.

Procuraduría General de la República orhets’ïkuxati ya jirinhant’ani néecha ísï at’aski, jimpoka jimat’u atawastiksï choferiimpani ka tsimani polícioechani énkaksï kwátani jamanka. Juramutiicha Michoacáni anapuecha wantastiksï éska jarhoap’eraakaksï juramutichani Guerrero anapuechani jinkoni.

Jini Ziracuaretiro, Miércoles jimpo Políciaecha kwárhukunhastiksï ka at’awastiksï, tsimaninha warhistiksï ka máteru tsimani atakataksï pakarasti. Polícia Michoacán wanotaxaptiksï jimasï ísï iretani kwátani énkaksï úkwarhinchaka.

Ka jueves jimpo, Policía Federal kwárhukunhastiksï ka at’awastiksï ékaksï nitamanka autopista Siglo XXI jimpo, ma policía warhisti ka máteru atakata pakarasti.

Secretario de Gobierno, Adrián López Solís, wantasti éska eratsint’axakaksï na xánimintu wétarhixaki kwáp’itarani Presidente municipaliichani, ka sánteru sáni ts’ïmani Tierra Caliente ísï anapuechani énka xáni no sési úkwarhini jaka, ísï éska Ziracuaretiro, nájkirunha yásï jameeri no ma juramuti municipiorhu anapu wantajki éska chéparhatanhaxaka.

Ixu Michoacán jorhentpiriicha, CNTE anapuecha treniiri xanharuni mítawant’astiksï yúmu tsimani municipio jimpo, Tsimani semana no jiaratasptiksï éska trenu parhikupinka, ka i semana wékastiksï ya jarhont’akwarhini ka órhutarakwani jarhontatawani

Isïnha pakatperanhasti martesï jimpo énka wantontskwarhinhaka Ciudad de México juramutiichani jinkoni. Ka ixu Michoacán jorhentpiriicha mayemunhastiksï ma kutsï ka terhuk’ani ánchikwarhiteeri.

Viernes jimpo orhets’ïkuti sesión XVIII CNTE anapu, wantasti éska yásïnha yúmu o yúmu tanimu mil jorhentpiriicha niwaka Ciudad de México ka sánteru wánerani ka winhats’ïtani kurhakwarhikwani énka jini tánkwarhitini jakaksï winhachani.

Ayentperata jimpo Víctor Manuel Zavala CNTE anapu orhets’ïkuti wantasti éska jorhentpiriicha no jinteska nénka jupiakaksï mámaru jásï mótsitarakweechani, ima wantasti éska jorhenkwarhiriicha jinteska nénka jupiaka ka jatsiaskaksï 170 mótsitarakweecha énka gobiernoeriika ka máteru nemaari mótsitarakweecha.

Ari semana mítikwarhisti éska Ernesto Fonseca Carrillo katap’erakwarhu wént’asti, jóperu chenembaonha ónhakwarhitini jawati jimpokanha antankutasti ya 70 wéxurini jatirini. I achaati mítinhasti éska Don Neto ka Rafael Caro Quintero jinkoni wétenaskusptiksï ka orhets’ïkuxantiksï Cártel de Guadalajarani. Ernesto Fonseca juramunhasti éska 40 wéxurhini japirinka ónkwarhitini jimpoka jupikaspka ka wantikuni Enrique Camarenani DEA anapuni ka materu kw’iripu ma, jimpoka ts’ïmiicha ánchikwarhiteempani mítikuaspti.

Yápuru ísï México ka xu Michoacán kánikwa janixati, Servicio Meteorológico Nacional wantasti éska janonkwaska ya huracani jantintskwa, jimposï úkwarhini jati tormenta tropical ka depresión arhikata, ka i wéxurhininha erokwarhixati 17 huracaniicha.

Jini Francia, Estado Islámico méntku nó sési útspexati, ka ari semana wantikuasti tanimu kw’iripuchani tiosï k’uta ma jimpo, ka tata curanha ma warhisti, énka ísï úkwarhika Papa Francisco Polonia jamaxapti, jimini kómu arhip’ikuasti yámintu ts’ïmanka wantikunhapka jima ka p’amok’usti tata curani énka Francia warhika.

Turquía anapu juramutiicha míkawaxati ayenperakweechani, ka wékaxati míkawani 100 wantakwa etskutarakweechani, ka wékaxati ónhatarkwarhiani 46 kw’iripu eyanpitiichani jimpoka juramutiicha wantasïnka éska ts’ïma jinteska énka wékanka petant’ani presidente Tayyip Erdogan, jimposï yásï wékani jati ónhani 88 wantakwa eyanpitiichani.
Notivideo
Fotogalería
Moru Warhariicha. Ni miyuni sáni Tarhe Jwáta

Moru Warhariicha. Ni miyuni sáni Tarhe Jwáta

Tiripiti terekwa. Ásïpiti

Tiripiti terekwa. Ásïpiti

Warhariicha Xarhakwarhu anapucha

Warhariicha Xarhakwarhu anapucha
Parhankwa

Parhankwa
Janixati ya yápuru ísï, ¿nanieski ixu?

Janixati ya yápuru ísï, ¿nanieski ixu?

COMENTARIOS
Derechos Reservados
© Notivideo