Resumen de noticias en Purépecha
Autor: Redacción
) 
Autor multimedia: Especial
Resumen de noticias en Purépecha
Ari ampe nitamakwarhesti i semana wéenani ma ekwatse ka t’émpini jurhiatikwa julio jimpo ka yúmu jurhiatikwa agosto 2016 jameri.
Ari ampe nitamakwarhesti i semana wéenani ma ekwatse ka t’émpini jurhiatikwa julio jimpo ka yúmu jurhiatikwa agosto 2016 jameri.
Autor multimedia: Especial
I semana ixu Michoacán, municipio de Cuitzeo, xarhant’astiksï t’émpini kw’iripu kurhirantskata, xarharasïntiksïnha éska orheta ataaspkaksï tiámu atarakwa jimpo.
Sábado 30 jimpo exenhant’astiksï, orheta juramutiicha wantanhaspti éska ts’ïmi warhiriicha ísï atanhaspka jimpoka sïpaxamanka gasolina, jimpoka jimasï énka exenhant’aka parhikusïnti ductoecha Pemexiiri, Jo peru ari semana inchamani juramutiicha wantasti éskanha Presidente Municipal ka policiecha Alvaro Obregón anapuecha ísï atawati.
Presidente Municipal ka t’ámu policiecha ónhanhasti erokani jarhani éska Juez exeaka ka wantaaka énka ts’ïmi k’amanharhintskwa jatsiski o no ampe ísï únksï. Tanimu kw’iripu tumpiechaspti, ma t’émpini yúmu tsimani jatirispti ka tsimani tumpiecha t’émpini yúmu tanimu wéxurhini jatirisptiksï ka Indaparapeo ka Alvaro Obregón anapuechaspti. Wantanhasïnti éska policiecha jupikawaspka ka páanksï máteru nanisisï ka jimaksï wántikwani ka tátsikwa ísï páanksï Cuitzeo ísï jimankaksï kurhirant’aapka.
Procuraduría jueves jimpo íntspiant’asti warhiriichani tatempeecha ka jatsinhant’astiksï. Ka kw’iripu kómku p’ikwarherasti ka kurhakuasti juramutiichani éskaksï xarhataaka ne ísï atawaski.
Ari semanat’u, Juez Federal Uruapan anapu juramusti éska ex autodefensaecha mayampiparini 120 mil peso úatiksï k’ataperakwarhu wérani ka wératini jameri kwap’ekorheni. Tsimani wéxurhinisti ya énka ma ekwatse ka yúmu t’ámu ex autodefensaecha ónhanhapka jimpoksï kámanka tiámu atarakweechani ejercitoeri míntakata. Yáasï jameri tanimku ex autodefensaecha ústiksï meyampini ka wéranksï; ts’ïminha jupikanhaspti jimani énka José Manuel Mireles jupikanhapkat’u.
I semana mítikwarhisti éska xarhatanhaska ma video arhikata jimanka xarharajka éska tata Cristu ma énka jaka tiostarhu jini Saltillo Coahuila, p’iranharhispka ka tátsekwa chúpatant’ani, wáni kw’iripu jakak’utiicha jáakwarhinhasti ka máteru kw’iripu no jakak’unhasti wantanksï áskanha inte video úkateeska, jimposï no yámintu kw’iripu jeyapenhent’asti ka ménku ísï arhip’eranhaxati jini Coahuila ísï.
Yápuru ísï anapu ánchekwarhekweeri orhets’ïkuti empresario arhikateecha Coparmex anapuecha, wantastiksï éskaksï tsámpikuaka CNTEni jimpokanha xáni xanharu míkaaka, wáni tumina tsítastiksï wáni estado jimpo ixu México. Ka ístunha tsámpikuatiksï juramutiichani estado ka federación anapuechani jimpokaksï no ma úsïnka ini ampe jorhempiriicheeri wantanhiakwani sési jurhiperant’ani.
Ka Viernes jimpo ts’ïmi empresarioecha inchamutastiksï amparo ma ka kurhakw’arhixatiksï éska juramutiicha sésimintu xanhataaka Estado de derecho arhikatani. Wantastiksï éska ts’ïmi tsïp’axaka wáni tuminu jimpoka xáni xanharu míkawakaksï ka jimpoka sïpakuakaksï íntspikwarhikweecharhu éska na úkwarhini jaka Chipas ka Oaxaca.
Ciudad de México, kw’iripu amparo ma inchamutastiksï jimpoka Secretaria de gobernación 72 jurhiatikwa míkatini jatsispka xanharuni Avenida Bucarelini, jimpoka no wékaxanti éska jorhentpiriicha Secretaría de Gobernación niérapirinka. Juez ma juramusti éska ima xanharu mítant’anhapirinka jimpoka watsotakwa tiámueri jimpo míkatini jatsispkaksï.
Ari semana jini Francia, wantanhasti éska sánteru wáni warhiiriichaska ya, imani jimpo énka Niza úkwarhenchapka, ka yásï wantanhasti éska 85 warhiriicha miyunt’anhaska. Juramutiicha Francia anapuecha wantasti éska jupikanhaska ma kw’iripuni énka úpirinka eratsini jarhani wáni kw’iripu wántikpeni.
Wétenakwarhisti Juegos Olimpicoecha jini Brasil, íst’u senadoriicha wantasti éska wétenakuakaksï juicio político Presidentani Dilma Rousseff, nénka namuni kútsï nóteru juramuni jaka ya.
Jakwarhinhasti ka wantanhantasti yápuru ísï énka mítikwarhika éska Sasha Presidente Obamaeri wáp’a, ánchikwarhixaka t’irekwa íntspikwarhikwarhu ma jimpo, jima kw’iripuni kéts’ïtakwasïnti t’irekwani ka kutsuts’ïtant’ani ampe. Kw’iripu wantasti éska arini ánchikwarhikwani jimpo kaxumpikwa xarhatasïnka.
Derechos Reservados
© Notivideo
© Notivideo