Resumen de noticias en Purépecha

Ari semana mítikwarhisti yápuru ísï éska warhiska Alberto Aguilera Valadez énka sánteru mítinhapka éska Juan Gabriel, inte Parácuaro Michoacán anapuespti, Intenha domingo 28 agosto jimpo warhisti chenempao jini Santa Mónica, California.

Paracuaro anapuecha énka ísï mítikaksï niratiksï jima chenempao tsïtsïki ka candela pákunksï ka ístu pákustiksï tsïtsïki ka candela jima kópikwarhu, miátsparini éska Juan Gabriel inteni ireta jimpo anapuska.

Pablo Aguilera Valadez, Juan Gabrieliiri erachiimpa kurhakuasti, Juan Gabrieliiri wap’eechani, éska jatsinhant’apirinka jini Paracuaro énka jantstini jaka amampempa, jimpokanha inte pireri ísï kurhakw’arhisaanti. K’óperu miércoles mítekwarhisti éska no jantapirinka, éska kurhiranhant’aska ka japu icherink’u patsanhaati, ka ísï ya juankunhati axuani México ka Bellas Artes páranhati ka jima janhanharikwa ma úminhati ka tatsikwa Ciudad Juárez ist’u janhanharhikwa ma úminhaati jimpoka jini kw’iripespka ka jimanha wénaspti pireni.

Wap’eempeecha sánku ísï wékasïntiksï wantani, nani jatsinhant’a tateempa, xánku wantasïntiksï éskanha no junkunhaka Paracuaro.

Juan Gabrieliiri erachiimpa wantasïnti éska no néma wantap’aska ka ayenkunksï nena eratsini jaki jatsint’ani, ka méntkuninha wap’eempani Alberto Aguilera Junior no néma sáni eyankusïnti.

I semana Nuevo León, mítetarpestiksï éska Registro civil íntspiaka mámaru jásï sïranteechani ka xarhatastiksï namanka xáni jukaparharaka meme arhikata jimpo sïranta tempuchakweeri, sïranta antap’inukweeri, sïranta kw’iripueri énka warhiaka ka énka tempuchatiicha jarharperanhaaka, ka ísï meme jimpo teresïmarhustiksï arini xásï wantakwani jimpo.

Miércoles jimpo Ciudad de México jurhasti Donald Trump, inte énka jinteka candidato partido republicano anapu jimpo, jimpokanha presidente Peña Nieto pimarhispti. Énka ísï juka kw’iripu nó sési erokasti jimpoka xáni no sési wantaka ixu México anapuchani no sési arhiani. Donald Trump ménkuni wantaxati éskanha tsintsikata ma jawataka énka nieraka juramitini ka México mayampiati inteni ánchikwarhitani. Margarita Zavala ka Hillary Clinton ka máteru kw’iripuecha wantastiksï éska no sési úska ísï jurhani México ka ísï wantani jarhani.

I semana wénakwarhisti janonkuni Cuba ma Avión énka Estados Unidos wératini juka, yóninha E.U. no jiakutasaanti éska Cuba anapuecha nipirinka jini, jimani ísï énka warhiperakwa japka Guerra Fría arhikata. Yáasïnha Cuba ka Estados Unidos úatiksï jurhani ka nirani ka meyapikwa ampe jatsini.

Jini Brasil, senadoriicha kéntitastiksï presidenta Dilma Rousseffini, jatsinhasti Michel Temer, intenha jinteati juramuti 2018 jameri. Inte juramuxapti jimpoka Dilma Rousseff kéntitanhaxapti ka yáasï íntsinhasti juramukwa.

Resumen de noticias en Purépecha

Autor: Redacción

Autor multimedia: Erik Sánchez García

Autor multimedia: Erik Sánchez García