Ísï nitamakwarhisti i semana, wenani 19 septiembre jimpo ka 23 jameri i k’utsïiri 2016 jimpo.
Autor: Redacción
) 
Autor multimedia: Especial
Ísï nitamakwarhisti i semana, wenani 19 septiembre jimpo ka 23 jameri i k’utsïiri 2016 jimpo.
Michoacán, jorhentpekwa anapu juramutiiicha wantastiksï éska méntkunha mítanhaxaka jorhentpekweecha énka mayempikwarhijka.
Michoacán, jorhentpekwa anapu juramutiiicha wantastiksï éska méntkunha mítanhaxaka jorhentpekweecha énka mayempikwarhijka.
Autor multimedia: Especial
Michoacán, jorhentpekwa anapu juramutiiicha wantastiksï éska méntkunha mítanhaxaka jorhentpekweecha énka mayempikwarhijka, ka máteru Estadoecha jimponha no ísïisti éska íxu na xáni wáni jakaksï. Yáasïnha sánteru wáni kw’iripu wékasïnti éska wap’eecha niwaka jorhenkwarhini imani jorhentpekwa jimpo énka ánchikwarhinhaaka jorhentperiicha, ísï jánhaxati ya móskuani jorhenkwarhiichani jimpoka jorhentpiriicha yáasï jameri méntku jamani jakaksï anhaxutani ánchikwarhikwani inteni paro arhikata jimpo, jimpokanha jorhentpiri democraticoecha ménku jupiperani jakaksï SEE anapu juramutiicha jinkoni.
Ka jarhastiksï jorhentpiikweecha gobiernoeri énka no wékani jakaksï jarhoap’ekwa ewap’ini, jimpokanha ísï arhasïntiksï éskanha jorhentpikwa úpirinti nóteru jinteni íntsimperakata, ísï wantasti Héctor Gutiérrez de la Garza énka orhets’ïkutika Instituto Nacional de la Infraestructura Física Educativa, énka Michoacán xanhatani jaka inteni ánchikwarhitani Escuelas de Cien.
Martes jimpo, Morelia mítirpestiksï éskanha jorhentpekwa ma jimpo sapiicheeri énka arhikwarhijka Víctor Hugo, tumpi manha nénka jorhenkwarhini jaka jinteni jorhentpiri, no kaxumpininha tsimani nanaka sapiichani p’arhiasti, ísï úkwarhisti jini Puerto de Buenavista. Juramuti Procuraduría de Justicia anapuecha wantasti ya éska tumpi ts’ïmini nanakeecha no sési manataska sïpatikwarhu jima incharini ísï. Tumpi énka ísï no sési úka yáasï jameri nótki jupikanhaxati.
Morelia Michoacán, miércoles jimpo, xarhintku ísï, no sési nitamakwarhisti jimpokanha tsimani tumpiichani jupiaptiksï pánksï no sési útspiriicha, jupiasptiksï jima jamukutini énka jaka casino arhikata, jima kw’iripu ch’anasïnti tumini antakwekani. Policíanha ixejti inteni ampe ka nirastiksï xanharu jimpo antankuani ka kw’aniperastiksï tiamu atarakwa jimpo ka ma tumpi énka páni japkasï warhisti ka ma tumpini énka pánkaksï ka tsimani policíeecha atakata p’akarastiksï.
Sési jimponha, no sésinha kurhakwarhispti jimasï wanontani ísï énka nitamanka policíeecha, nó sési útspiriichani antankuani, ka nónha úsptiksï antankuani.
Jorhenkwarhiriicha énka no úka inchani Universidad Michoacanarhu, éska na mítikwarhika ya tanimu semana míkatiniksï jatsisti inteni jorhentperakwani kúnkwarhitini inteni tánkwarhikwani jimpo Movimiento de Aspirantes y Rechazados, ka ari jueves jimpo, jorhenkwarhiriicha jimini anapuecha tánkwarhint’astiksï ka jánkwarhistiksï mítant’ani C.U. ka máteru jorhentperakwaeechani énkaksï míkatini jatsiaka.
Jini jorhentpekwa odontología, jorhenkwarhiicha jupiperastiksï, ts’ïmani jinkoni énka míkatini jatsika jimini ka jinit’u C.U. jupiperastiksï ka policíaecha niérastiksï jima ka no ústiksï inchakukwani jorhenkwarhiriichani jimpoka inte jorhentperakwa jatsikwarhiska juramukueempani.
Jimini tsimani retrato pitariicha ka yúmu jorhenkwarhiriicha atakata p’akarastiksï. Ka yáasï jameri jorhentperakweecha míkatini jatsiastiksï.
Gobierno del estado ka juramuti UMSNH anapu, wantaxatiksï ayakuani éska úaka inchani 22 mil jorhenkwarhiriicha, mamapuru jorhentperakweecharhu. Medardo Serna, rector Universidad Michoacana anapu wantasti éskanha ménteru mítanha karakwarhintskwa ka úati inchakuksï mil 50 jimpanhi jorhenkwarhiriicha.
Jini Estado de México ari semana wantikunhasti María Villar Galaz España anapuni, intenha jupikanhaspti ka tuminu kurhakwarhinhani; wantanhasïnti éska juramutiicha Estado de México anapuecha nóksï sési jánkwarhispka kwáp’int’ani Maríani, ka amposïnha no úptiksï ixent’ani nájkinha mayampipkaksï pari xaratanhant’ani, warhiri ixenhant’asti.
Ari semanat’u jini Papantla, Veracruz, kurhantikwarhisti éskanha tsimani tata curaecha warhiri ixenhantaska, ka jakak’utiicha no sési ixejti. Ka xu Michoacán cardenal Alberto Suárez Inda mítitarpisti éska tata cura Puruándiro anapu, éska no xarhant’asïnka, éskanha lunes 19 septiembre jimpo no ixent’anhasïnka, ka Procuraduría de Justicia úntasti jirinhant’ani ya.
Vicente Fernández corrido ma úkunt’asti Hillary Clinton, ka jima kurhakusïnti éska no mírikurhiawaka latinoechani éka ampe niaraska juramutini Estados Unidos, inteni pirekwani jimpo arhisïnti éska latinoecha ka México anapuecha wékasïnka jarhoatani Hillaryirini ánchikwarhita.
Ka jini yawani ísï, Carolina del Norte, no sési jántixati jupiperanksï, jimpoka policía Charlotte anapu wantikuka achaati turhipinharhi ma, ka jinit’unha Oklahoma, nanaka ma énka jinteka policía méntkuni wantikusti turhipinharhini ma. Wáni kw’iripu no sési ixejti ka xanharu wiakustiksï kurhakw’arhiparini éska turhipinharhiicha jánhanharhinhaaka yápuru ísï Estados Unidos.
Derechos Reservados
© Notivideo
© Notivideo