Ari ka ari ampe nitamakwarhisti i semana, wénaparini lunes 30 enero jimpo ka viernes 03 febrero 2017
Autor: Redacción
) 
Autor multimedia: Miguel García Velázquez
Ari ka ari ampe nitamakwarhisti i semana, wénaparini lunes 30 enero jimpo ka viernes 03 febrero 2017
CNTE anapu jorhentpiriicha, ts’ïmit’u wéakustiksï kurhakw’arhini éska gasolina no xáni jukaparhaka, jimposï Morelia ka Lázaro...
CNTE anapu jorhentpiriicha, ts’ïmit’u wéakustiksï kurhakw’arhini éska gasolina no xáni jukaparhaka, jimposï Morelia ka Lázaro...
Autor multimedia: Miguel García Velázquez
Autor: Alicia Mateo
Axu Michoacán i semana kw’iripu tánkwarhisti kúnkwarhikueechani jinkoni ka winhachastiksï éska no jiókwarhisïnka éska gasolina sánteru jukaparhaka, ka pimarhixati kw’iripuni éska kúnkwarhiaka ka márku kurhakw’arhini éska gasolina nóteru xáni jakaparhaka, jimpokanha i kutsï sánteru karhatanhaka.
CNTE anapu jorhentpiriicha, ts’ïmit’u wéakustiksï kurhakw’arhini éska gasolina no xáni jukaparhaka, jimposï Morelia ka Lázaro Cárdenas míkastiksï xanaru ísï wínhachaparini, jóperut’u kurhakw’arhisïntiksï éska petanhaaka jorhentpirini nénka ónhakata jaka diciembre 2016 jimpotki. ka trenini xanharu míkakustiksï jini Lázaro Cárdenas ka policíeecha jamasti jarhontawani.
Jini jupiperastiksï policíaechani jinkoni ka kwanip’erastiksï tsakapu, chukari ka bomba molotov jimpo ka gas lacrimógeno jameri. Wantanhasïnti éska tsimani policíaecha atakata pákaraska ka 6 jorhentpiriiichani ónhastiksï. Mítikwarhisti éska inteni jimposï káni no sési janhaskwarhiska, íntsperakueechani jimpo sïpanhasti ka kurhirant’ani jameri.
Partido Acción Nacional kurhakusti Congreso Michoacán anapuni éska nóteru xáni diputado plurinominaleechawaka, ka inteni jimposï wékasïntiksï éska kéntitanhaaka 10 diputadoechani ka nóteru xáni tumina mayempini gobierno.
I semana Secretaría de Hacienda y Crédito Público wantasti éska nótki ampe karhatanhaka gasolina, éska na méteru wantakata japka, éska erokwarhiakaksï ma semana ka jimani karhatanhani 11 jurhiatikwarhu i kutsï jimpo.
Jini Veracruz, jamaxatiksï sési mítinhani ampemintu úkwarhiski, jimpoka gobernador Miguel Ángel Yunes Linares wantasti éska no sési ts’inapinhaxapka énka Javier Duarte juramuni japka jima, Yunes Linares wantasti éskanha sapi cáncer p’amenchatiichani no íntskuaxaptiksï sési tsinap’itakua. PGR ixexati némintu k’amanharhintskwa jatsiski jimpokanha t’ámu tsampikwa jarhaska.
Axu México, diputaduecha juramustiksï éska Código Nacional de Procedimientos Penales juramuaka éska némanka no sési kámaaka warhiitiichani úati ónhanhani, jimpokanha wáni warhitiichani atawaxakaksï ya.
Jimposï ixu Michoacán inteni juramukwani chumastit’u, jimpoka diputaducha wantasïnti éska t’ámu wéxurhini jimpo sánteru warhinhaska. Ka 2013 ka 2015 jameri sánonha 6 mil 488 warhimasïicha wantikuanhasti.
Jini Francia, ma achaati wantikunhasti jimpokinha paxapka ma warhokutarakwa ka ma takusï atakwani jásï ka wékasaantinha inchani Museo Luvre, jimposïnha soldaduecha kw’anirapti ka wantikunksï jima Museorhu wérakwa, jimpokinha tantiarisïantiksï éska ima achaati wáni kw’iripuni wékaxapka wantikwani.
Janhaskatiicha ixent’asti kéri japontarhu inchamerani Oceano indico arhikata jimpo, ji Africa ísï, mámaru ampe énka tsïma jakak’ujka éskanha jima jarhaspka ma kéri ómikwa énka nóteru jaka ya, imanha arhikorthespti Gondwana, ka sano 200 millon wéxurhini jima jarhaspti. Janhaskatiicha wantasïnti éskaksï tsakapu zirconia ampe ixent’aska énka wáni millóni wéxurhini jatirika ka imanha k’éri ampe mítikuesti.
Derechos Reservados
© Notivideo
© Notivideo